Audio do 9º A Radio Conta por APEM Coruña

¿Queres volver escoitar a novena edición do programa A Radio Conta ? Podes facelo aquí

Publicado en Uncategorized | Deixar un comentario

As radios da Coruña, unidas pola saúde mental

Novena edición do programa A Radio Conta por APEM o 26 de decembro

Oito emisoras públicas e privadas da Coruña volven unir as súas voces no programa solidario ‘A Radio Conta’. Esta iniciativa chega á súa novena edición estedomingo, 26 de decembro de 2021 de 17h a 20h. Desta volta, está dedicada a APEM, a Asociación Pro Enfermos Mentais da Coruña.

O xornalista Moncho Viña será o encargado de introducir unha redacción única que conforman profesionais de Radio Nacional de España, Radio Coruña-Cadena Ser, Onda Cero, RadioVoz, Radio Marca, COPE, Intercoruña e Radio Galega, que achega a cobertura técnica. En total, arredor dunha trintena de persoas participan neste programa coral que ten dous obxectivos: a solidariedade e a homenaxe á radio más próxima.

PARTICIPANTES

A Radio Conta contará na súa novena edición co actor e humorista Xosé Antonio Touriñán como parte do equipo. Escoitarase a música do Coro Xove da Orquesta Sinfónica de Galicia, Radio Océano, Lucía Pérez e Vizcaíno, e terán presenza as Tanxugueiras, a piques de se confirmar a súa participación en Eurovisión.

No programa están convidados Paco Lodeiro, Suso Martínez, Diana Sieira e Roi da Costa. No eido do deporte, terán protagonismo os olímpicos e paralímpicos Enmanuel Reyes, Alberto Seoane e Adiaratou Iglesias. Tamén pasarán pola emisión dous supercampións octoxenarios: un do atletismo, Pepín Rioseco, e outro da moda, Andrés García-Carro, ‘The Spanish King’.

Alén diso, volve o radioteatro, con tres pezas escritas especialmente para o programa polo guionista Óscar Cruz. O teatro permitirá ademais un encontro inédito entre a actriz María Casares e o cineasta José Sellier, a piques de cumprirse os centenarios do seu nacemento e a súa morte, respectivamente.

POLA SAÚDE MENTAL

Neste ano de pandemia no que medrou a sensibilidade pola saúde mental, esta novena edición dará visibilidade a APEM, A entidade ofrece rehabilitación psicosocial e laboral a persoas con enfermidades mentais, uns apoios cos que poden levar unha vida independente, normalizada e integrada na sociedade. Ademais de coñecer o labor de Apem, parte das persoas usuarias terán voz propia nun espazo de radio dentro da radio incluído no programa.

EDICIÓN SEN PÚBLICO

Finalmente, esta novena A Radio Conta poderá seguirse exclusivamente pola radio. Debido á mala evolución da situación sanitaria houbo que variar a previsión inicial nun tempo récord. Deste xeito, non se realizará no Teatro Rosalía Castro, nin haberá a retransmisión streaming que ía ofrecer o Concello da Coruña. En todo caso, a emisión de tres horas mantense para o domingo 26 ás 17h.

Emisoras participantes emitirán o programa para a área da Coruña, e tamén se retransmitirá en toda Galicia a través da Radio Galega e RNE. Asemade, Radio Nordés sumarase á emisión desta novena A Radio Conta na súa respectiva área de cobertura.

As persoas que queiran colaborar con APEM poden facelo a través da seguinte conta bancaria:

ES22 2080 0059 4730 4000 9633 (ABANCA)

Publicado en Uncategorized | Etiquetado , , , , | Deixar un comentario

Audio do 8º A Radio Conta

¿Queres volver escoitar a oitava edición do programa A Radio Conta? Podes facelo aquí:

Ir a descargar

Publicado en Uncategorized | Deixar un comentario

A Radio Conta polos heroes da pandemia

Lámina conmemorativa de A Radio Conta 2020, por Siro López

Oito emisoras da Coruña volven unir as súas voces no programa solidario ‘A Radio Conta’. Esta iniciativa chega á súa oitava edición mañá sábado, 26 de decembro de 2020 de 17h a 20h. Será unha retransmisión especial, dedicada ás persoas e entidades que deixaron a pel polos demais debido á pandemia do coronavirus.

‘A Radio Conta’ é un programa coral en homenaxe á radio más próxima, único en Europa. A elaboración corre pola conta dunha redacción que conforman profesionais de Radio Galega, Radio Nacional de España, Radio Coruña-Cadena Ser, RadioVoz, Radio Marca, Onda Cero, COPE e Intercoruña.

Unha chea de convidados aparecerán nestas tres horas de radio coa ollada posta nas persoas que o deron todo na crise sanitaria. Nesta edición especial, poderanse oír voces desde a Garda Civil, a investigación sanitaria, as entidades sociais, as residencias de maiores, o empresariado, o deporte e mesmo a propia radio. Cada unha, co seu compromiso e a súa experiencia marcada polo coronavirus, que tamén deixa historias cotiás entrañables dignas de contar.

De novo, non faltará o humor. David Perdomo, Xosé Antonio Touriñán, Fede Pérez, Marcos Pereiro, Pedro Brandariz e Oswaldo Digón estarán nesta oitava ‘A Radio Conta’ e lembrarán os momentos nos que animaron o confinamento de moitas persoas. Contaremos coa gaiteira Susana Seivane e co actor Tamar Novas, e estará tamén unha habitual dos concursos televisivos, Victoria Folgueira.

O radioteatro terá un especial protagonismo nesta edición. O guionista Óscar Cruz escribiu e dirixiu tres pezas dedicadas a falar, de xeito nada habitual, da pandemia da gripe española ou da Real Expedición Filantrópica da Vacina. Contará coas voces de Paco Lodeiro, Carlos Jiménez, Suso Martínez e os xornalistas das diferentes radios. Darán primicias inéditas e ofrecerán entrevistas exclusivas relacionadas co eido sanitario.

Esta oitava ‘A Radio Conta’ poderá seguirse exclusivamente pola radio, debido ás restricións sanitarias obrigadas pola COVID-19. As emisoras participantes emitirán o programa para a área da Coruña, e tamén se retransmitirá en toda Galicia a través da Radio Galega e RNE. Así mesmo, Radio Nordés e Radio Ferrol sumaranse á emisión desta oitava A Radio Conta nas súas respectivas áreas de cobertura.

Publicado en Uncategorized | Deixar un comentario